Алматыда трамвай бағдаршамнан бұрын, 1937 жылғы желтоқсан айында пайда болды және 1980-ші жылдардың ортасына дейін белсенді түрде дамыды. Желілердің ұзындығы 68,8 шақырымды құрады, ал орташа тәуліктік жолаушылар ағыны - 138 мыңнан астам адам болды. Салыстыру үшін, Алматы метрополитені 11,3 шақырым жолмен 45.000 адам тасиды.

1980 жылдары қалада трамвай желілерін ұзартудың іске асыруға дайын жобасы болды, ол бойынша Қазақфильм, Жетісу, Мамыр, Қалқаман және басқа ықшамаудандарды орталықпен ғана емес, сонымен қатар бір-бірімен байланыстыру қамтамасыз етілуі тиіс еді! Қырық жыл бұрынғы жоспарлар іске асырылған жағдайда қалада аса тиімді трамвай желісі пайда болар еді.

Бірақ Республика басшылығы басымдықты өзгертті – жұмыс істеп тұрған, тарамдалған трамвай желісін әрі қарай дамытудың орнына, «беделі жоғарырақ» метроның пайдасына шешім қабылданды. Нәтижесінде, бізде қазір бір метро тармағы бар, бірақ ол 2003 жылы жартылай қираған трамвайлар желісімен салыстырғанда азырақ жолаушылар тасиды.

Бүгінгі таңда жағдай қайталанып отыр. Жоба бойынша негізгі жұмыстың жүргізіліп қойғанына және тіпті конкурстың бірінші кезеңінің қорытындысы бойынша финалисттердің анықталғанына қарамастан, биліктегілер іс жүзінде метро құрылысына көңіл бөліп, жүрдек трамвай салу жоспарларын тоқтатып қойды.

Urban Forum Kazakhstan метро жүйесінің құрылысына жалпы қарсы емес, бірақ егер қаланың алдында екі таңдау болса: көбіне жеке үйлерден тұратын Қалқаман ықшамауданына дейін метроны созу керек пе, жоқ әлде бүкіл қала арқылы заманауи жүрдек трамвай салу керек пе деген мәселе тұрса, біз сөзсіз трамвайды таңдар едік.